टोकियो । जापानको एउटा सहरमा खतरनाक केमिकलको ट्याङ्कीमा एउटा बिरालो खसेको छ ।
हिरोशिमा प्रिफेक्चरको फुकुयामा सहरमा रहेको नोमुरा मेक्की फुकुयामा कारखानामा आइतबार रातिको समयमा यो घटना भएको थियो । यो घटनापछि अधिकारीहरूले गस्ती बढाएका छन् । स्थानीयहरूलाई बिरालोको नजिकमा नजान अनुरोध गरिएको छ ।
बिरालो क्यान्सर गराउने केमिकल हेक्जाभ्यालेन्ट क्रोमियम राखिएको ट्याङ्कीमा खसेको थियो । सप्ताहन्तपछि कर्मचारीहरू कारखाना फर्किदा ट्याङ्कीलाई छोपिएको एउटा सिट अलिकति च्यात्तिएको पाए । यो केमिकल विशेष गरी आँखा, छाला र स्वासप्रश्वास प्रणालीका लागि खतरनाक बताइन्छ । कारखानाका कर्मचारीहरू प्राय प्रोटेक्टिभ कपडा लगाएर बस्ने गरेका छन् ।
सोमबार बिहान कर्मचारीहरूले कारखानाको भुँइमा बिरालोको पञ्जाको छाप भेटेको कारखानाका म्यानेजर आकिहिरो कोबायाशीले बताएका थिए । वरपर बिरालोको खोजी गरिएको भएपनि भेटिएन । बिरालो जिउँदो छ कि मरिसक्यो भन्ने थाहा हुन सकेको छैन । तर कर्मचारीहरुले बिरालोको खोजी तीव्र पारेका छन् ।
