काठमाडौँ । धनुषामा एक किशोरको हत्या भएको छ । तीन युवाबिचको विवादका क्रममा चक्कु प्रहार हुँदा १८ वर्षीय कैफ नदाफको मृत्यु भएको हो ।
प्रहरीका अनुसार धनुषाको जनकनन्दनी गाउँपालिका वडा नम्बर २ मा गएराति अन्दाजी साढे १० बजे मृतक १८ वर्षीय नदाफसहित अन्य दुई युवा २० वर्षीय सहमद नदाफ र २२ वर्षीय दासिम नदाफ मदिरा सेवनका लागि सोही वडाको एक बगैँचामा पुगेका थिए । ती तीन जन रोजा खुलेपछि वियर खान बगैँचामा पुगेको खुलेको जिल्ला प्रहरी कार्यालय धनुषाका डीएसपी रञ्जन अवाले जानकारी दिए ।
उनका अनुसार वियर खाएर फर्किने क्रममा मदिराको नसामा मोबाइलमा भएको भिडियो र बियरको पैसाको विषयमा भएको विवादले उग्र रुप लिएको थियो । सो क्रममा ठेलमठेल र कुटाकुट हुनुका साथै कैफको घाँटीमा चक्कु प्रहार भएको थियो ।
घटनापछि उनी भाग्दै ४० मिटरको दुरीमा रहेको घरमा पुगेको र परिवारले उपचारका लागि भारत लगेका थिए । तर, उपचारका क्रममै उनको मृत्यु भएको प्रहरीले जनाएको छ । घटनापछि परिवारले प्रहरीलाई खबर नगरी गुपचुप अस्पताल लगेको खुलेको छ।
यस्तै उपचारका क्रममा कैफको मृत्यु भएपछि परिवारले शव घर ल्याएका थिए भने त्यसपछिमात्रै प्रहरीलाई खबर गरिएको थियो ।
प्रहरीलाई राति साढे २ बजे खबर गरिएको र त्यसपछि पुगेको प्रहरी टोलीले सहमद नदाफ र दासिम नदाफलाई पक्राउ गरेर अनुसन्धान अघि बढाइएको डीएसपी अवाले जानकारी दिए ।
