नयाँ दिल्ली । बलिउड अभिनेत्री आथिया शेट्टी आमा बन्न लागेको खबरहरू आइरहेका छन् । आथियाका पिता अभिनेता सुनिल शेट्टीले एउटा रियालिटी शोमा अर्को सिजनमा हजुरबुबा बनेर स्टेजमा फर्किन्छु भनेपछि अभिनेत्री गर्भवती भएकी हुन् भन्ने हल्ला चलेको हो ।
डान्स दिवाने ४ मा माधुरी दिक्षितको साथमा सुनिल शेट्टी पनि जज हुन् । यही शोमा हालै हजुरबुबा–हजुरआमा विशेष एपिसोड थियो । यस क्रममा सहभागीहरूले यो थिममा रमाइला रमाइला प्रफर्मेन्स गरेका थिए । शोकी होष्ट भारती सिंहले सुनीललाई हजुरबुबा बनेपछि उनले धेरै कुराहरू परिवर्तन गर्नुपर्ने बताएकी थिइन् । सुनिल हजुरबुबाको उमेरको नदेखिने र उनी जस्तो गुड लुकिङ हजुरबुबालाई बच्चाले सम्हाल्न नसक्ने भन्दै भारतीले जिस्काइन् ।
‘हो, अर्को सिजनमा जब म स्टेजमा आउनेछु, तब हजुरबुबा जस्तै गरी स्टेजमा हिँड्नेछु,’ सुनिलले भनेका थिए । उनको यो जवाफ सुनेपछि मानिसहरूले उनी शोका अर्को सिजन आउँदासम्म हजुरबुवा भइसक्ने अड्कल गरिरहेका छन् । तर, यसबारे पुष्टि भएको छैन ।
सुनील शेट्टीकी छोरी आथिया शेट्टीले सन् २०२३ को जनवरी २३ मा क्रिकेटर केएल राहुलसँग बिहे गरेकी थिइन् । बिहेअघि दुवैजना करिब ४ वर्षसम्म सम्बन्धमा थिए । आथियाले सन् २०१५ को फिल्म हिरोबाट सुरज पञ्चोलीसँग बलिउडमा डेब्यु गरेकी थिइन् । तर त्यो फिल्म खासै चलेन । यसपछि उनी मुबारकन, मोतीचूर चकनाचूर जस्ता केही फिल्ममा देखिइन् । विवाहपछि भने उनले कुनै पनि चलचित्र साइन गरेका छैनन् ।
