काभा भलिबल नेसन्स लिगको समूहको अन्तिम खेलमा नेपालले माल्दिभ्सलाई ३-० को सोझो सेटमा पराजित गरेको छ।
सोमबार त्रिपुरेश्वरस्थित राष्ट्रिय खेलकुद परिषदको कभर्ड हलमा नेपालले माल्दिभ्सलाई २५-८, २५-१९ र २५-१८ ले पराजित गरेको हो।
प्रतियोगिताको सेमिफाइनल समिकरण पूरा भइसकेको छ। सोमबार आफ्नो अन्तिम खेलमा भारतले श्रीलंकालाई ३-० को सेटमा पराजित गरेसँगै शीर्ष स्थान पक्का गर्यो।
हारसँगै श्रीलंकाले चौथो स्थानमा रह्यो। अब भारत र श्रीलंकाबीच नै सेमिफाइनल हुनेछ।
यता भारतको जितले नेपालको शीर्ष स्थानमा रहने सम्भावना सकिएको थियो। अब दोस्रो भएको नेपाल र तेस्रो भएको इरानले सेमिफाइनलमा प्रतिस्पर्धा गर्नेछन्। यता माल्दिभ्स भने सबै खेलमा पराजित भयो।
यसअघि आइतबार इरानसँग ३-२ को सेटमा पराजित भएपछि नेपालको शीर्ष स्थानमा पुग्ने सम्भावना कमजोर बनेको थियो।
सेमिफाइनलमा भोलि मंगलबार भारत र श्रीलंकाबीच पहिलो सेमिफाइनल तथा नेपाल र इरानबीच दोस्रो सेमिफाइनल हुनेछ। पर्सी बुधबार प्रतियोगिताको फाइनल हुनेछ।
