काठमाडौं । सत्तारुढ दल नेकपा एमालेका अध्यक्ष केपी शर्मा ओलीले कान्तिपुर मिडिया ग्रुपका अध्यक्ष कैलाश सिरोहिया ३ दिनमा छुट्ने दाबी गर्नुभएको छ ।
धनुषा जिल्ला अदालतले अनुसन्धानका लागि प्रहरीलाई भोलिसम्मको म्याद दिएका बेला सत्तारुढ दल एमालेका अध्यक्ष ओलीले ३ दिनपछि छुट्ने दाबी गर्नुभएको हो । आज सुनसरीमा एक कार्यक्रममा बोल्दै ओलीले एकजना व्यक्ति पक्राउ पर्दैमा धुरुधुरु रुनु नपर्ने भन्दै सिरोहियाको पक्राउलाई गलत भनिरहेकाहरूको आलोचना समेत गर्नुभयो ।
ओलीले आफ्नो दल प्रेस तथा अभिव्यक्ति स्वतन्त्रताको पक्षमा लडेको पार्टी भएको दाबी गर्न भने छोड्नुभएन ।
अर्को प्रसंगमा ओलीले आफ्नै पार्टीका नेता पक्राउ पर्दा विज्ञप्ति ननिकाल्ने कांग्रेसले सिरोहिया पक्राउ पर्दा भने विज्ञप्ति निकाल्न हतार गरेको भन्दै आश्चर्य प्रकट गर्नुभयो । यस्तै, अध्यक्ष ओलीले गृहमन्त्री रवि लामिछानेका विरुद्ध कांग्रेस खनिनु ‘भँगेरा मार्न तोप लिएर हिँड्नु’ जस्तो भएको भन्दै व्यङ्ग्य गर्नुभयो ।
