काठमाडौँ । काठमाडौँ महानगरपालिका–१४ स्थित कलङ्कीमा एक जना सांसदको डेरामा चोरी भएको छ । दसैँको बिदामा सांसद उर्मिला थपलियाको डेरामा चोरी भएको हो ।
परिवारका सदस्यहरू दसैँ मनाउन जिल्ला गएको मौका छोपेर आरोपीहरूले उनको डेराबाट ८ तोला सुन र ८० हजार नगद चोरेका हुन् । घटनाबारे कात्तिक ५ मा प्रहरीलाई जानकारी गराइएको थियो । थपलिया नेपाली कांग्रेसकी समानुपातिक तर्फकी सांसद हुन् ।
चोरीमा संलग्न आरोपमा ३ जना सशङ्कितहरूलाई नियन्त्रणमा लिइएको जिल्ला प्रहरी परिसर काठमाडौँका एसएसपी दिलीप घिमिरेले रातोपाटीलाई बताए । उनले भने– ‘चोरीमा संलग्न ३ जनालाई नियन्त्रणमा लिएका छौँ, सोधपुछ हुँदैछ ।’
कात्तिक ६ मा कलङ्कीमा रहेको नीरज नेपालको घरमा पनि चोरी भएको थियो । नेपालको घरबाट १३९ तोला चाँदी, १ तोला सुन र १० हजार नगद चोरी भएको हो । दुई वटै चोरीमा संलग्न समूह एउटै भएको प्रहरीको अनुसन्धानले देखाएको छ ।
दुई वटै चोरीमा एउटै समूह संलग्न देखिएको एसएसपी घिमिरेले बताए । चोरीमा संलग्नहरूको नाम प्रहरीले सार्वजनिक गरेको छैन । आरोपीहरूलाई काठमाडौँ परिसर र उपत्यका अपराध अनुसन्धान कार्यालयको संयुक्त टोलीले नियन्त्रणमा लिएको हो ।
