चितवन । चितवनको पूर्वी क्षेत्रका बासिन्दाहरू फेरि अँध्यारोमा बस्न बाध्य भएका छन्। अत्यधिक गर्मी र मनसुनमा समेत पर्याप्त वर्षा नपरेपछि सिँचाइको लोड एक्कासि बढेपछि नेपाल विद्युत् प्राधिकरण चनौली वितरण केन्द्रले आजदेखि लोडसेडिङ सुरु गरेको छ।
प्राधिकरणले सार्वजनिक गरेको तालिकाअनुसार अबदेखि विभिन्न फिडरमा दिनमा दुईपटक गरी ६ घण्टा विद्युत् आपूर्ति बन्द हुनेछ। नारायणी–माडी फिडरमा बिहान ६ बजेदेखि ९ बजेसम्म र दिउँसो ३ बजेदेखि ६ बजेसम्म लोडसेडिङ हुनेछ। मेघौली–विजयनगर–शुक्रनगर फिडरमा बिहान ९ देखि १२ बजेसम्म र बेलुका ६ देखि ९ बजेसम्म, भने जगतपुर–रामपुर फिडरमा दिउँसो १२ बजेदेखि ३ बजेसम्म र राति ९ बजेदेखि १२ बजेसम्म विद्युत् सेवा अवरुद्ध हुने प्राधिकरणले जनाएको छ।
प्राधिकरणका अनुसार रोपाईं सिजनमा पानीको स्रोत अत्यन्त कमजोर बनेको र किसानहरू विद्युत् मोटरमार्फत सिँचाइमा निर्भर बन्न थालेपछि विद्युत् माग अत्यधिक बढेको हो। यसले वितरण क्षमतामा चाप सिर्जना गरेकाले लोड व्यवस्थापनका लागि अस्थायी लोडसेडिङ गर्नुपरेको जनाएको छ।
गर्मी, सिंचाइ र विद्युत्को त्रिकोणीय दबाबले कृषि प्रधान क्षेत्र मानिने चितवनका किसानहरू चिन्तित छन्। स्थानीय स्तरमा सोलार ऊर्जा र वैकल्पिक स्रोतप्रति सरकारको लगानी र दीर्घकालीन नीति नहुँदा यस्ता समस्या बारम्बार दोहोरिइरहेका छन्।
अबको चुनौती भनेको विद्युत् आपूर्ति पुनर्संतुलन मात्र नभई, कृषि सिजनमै विद्युत् संकट दोहोरिन नदिन दीर्घकालीन संरचनागत समाधानतर्फ केन्द्रित हुनु हो।
