एजेन्सी । जुड बेलिङघमले दोस्रो हाफमा दुई गोल गरेपछि यस वर्षको पहिलो एल क्लासिकोमा रियल मड्रिडले बार्सिलोनालाई २-१ ले पराजित गरेको छ ।
स्पानिस ला लिगा अन्तर्गत शनिबार भएको खेलमा रियलले एक गोलले पछि परेको स्थिति उल्ट्याउँदै बार्सिलोनामाथि पुनरागमन जित निकालेको हो ।
घरेलु मैदान क्याम्प नोउमा भएको खेलको छैटौं मिनेटमै एल्के गुन्डोगानको गोलमा बार्सिलोनाले पहिले अग्रता लिएको थियो । तर त्यसलाई कायम राख्न सकेन ।
यस सिजन लयमा रहेका युवा स्टार बेलिङघमले दोस्रो हाफमा दुई गोल गरी रियललाई जिताए । ६८औं मिनेटमा बेलिङघमले रियलका लागि बराबरी गोल गरे ।
त्यसपछि इन्जुरी टाइमको दोस्रो मिनेटमा उनले लुका मोडरिकको पासमा गोल गर्दै रियललाई जितसहित तीन अंक दिलाए ।
जितपछि ११ खेलबाट २८ अंक जोडेर रियल शीर्ष स्थानमा छ । समान खेलबाट २४ अंक रहेको बार्सिलोना तेस्रो स्थानमै छ ।
सेल्टाभिगोलाई १-० ले पराजित गरेको गिरोनाले रियल समान २८ अंक जोडेर दोस्रो स्थानमा छ ।
