काठमाडौँ । काठमाडौँस्थित जनप्रशासन क्याम्पसमा अर्कैको नाममा परीक्षा दिइरहेका एक नक्कली परीक्षार्थीलाई प्रहरीले पक्राउ गरेको छ।
जिल्ला प्रहरी परिसर काठमाडौँका अनुसार पक्राउ पर्ने व्यक्ति जुम्लाको चन्दननाथ नगरपालिका–८ का २६ वर्षीय केशव रोकाया हुन् । उनी हाल काठमाडौँ महानगरपालिका–४, धुम्बाराहीमा बसोबास गर्दै आएको प्रहरीको भनाइ छ ।
एमपिए तेस्रो सेमेस्टरमा अध्ययनरत दानबहादुर रोकायाको नाममा परीक्षा दिइरहेका उनलाई जनप्रशासन क्याम्पसको उजुरीको आधारमा प्रहरी वृत्त कालीमाटीबाट खटिएको टोलीले पक्राउ गरेको हो।
उनीमाथि शिक्षासम्बन्धी ऐन अन्तर्गतको कसूरमा जिल्ला प्रशासन कार्यालय काठमाडौँबाट पाँच दिनको म्याद थप अनुमति लिएर हाल अनुसन्धान भइरहेको प्रहरीले बुधबार जानकारी दिएको छ।
