काठमाडौँ । युवतीलाई हैरानी दिएको आरोपमा एक जना युवक प्रहरीको हिरासतमा छन् । नुवाकोटको सूर्यगढी गाउँपालिका–४ हिरामुनीटार घर भएका २७ वर्षीय सुमित भट्टराई भदौ ८ मा पक्राउ परेका हुन् । उनलाई प्रहरी वृत्त कालिमाटीको हिरासतमा राखिएको छ ।
तार्केश्वर नगरपालिका वडा नम्बर–१० स्थित मनमैजुमा बस्दै आएका भट्टराई शिक्षक पनि हुन् । बल्खु बस्दै आएकी एक जना २० वर्षीया युवतीलाई हैरानी दिएको आरोपमा उनी पक्राउ परेका हुन् ।
ती युवती आफूलाई मन पर्ने भन्दै उनले लगातार पछ्याएर हैरानी पारेको आरोप छ । सार्वजनिक बस र टेम्पोमा पनि लगातार पछ्याउने र म्यासेज गर्ने गरेपछि युवतीले प्रहरीमा जाहेरी दिइन् । अनुसन्धानमा संलग्न प्रहरी अधिकृतहरूका अनुसार भट्टराईले ती युवतीलाई ७ सय पटकसम्म म्यासेज गरेको भेटिएको छ । ईसेवामा १ रुपैयाँको दरले रिचार्ज गरेर रिमार्कमा म्यासेज पठाएर उनले हैरानी पार्ने म्यासेज पठाएका हुन् ।
युवतीले उनीविरुद्ध सुरुमा साइबर ब्युरोमा जाहेरी दिएकी थिइन् । साइबर अपराधको कसुरमा प्रमाण नपुग्ने भन्दै उनलाई ब्युरोका अधिकृतहरूले स्थानीय प्रहरीमा जान आग्रह गरेका थिए ।
त्यसपछि उनले दरबारमार्ग र सोह्रखुट्टे वृत्तमा उजुरी गरेकी थिइन् । त्यहाँ छलफल भएपछि पनि लगातार हैरानी गरेपछि युवकविरुद्ध पीडितले प्रहरी वृत्त कालिमाटीमा जाहेरी दिएकी हुन् ।
भट्टराईलाई थुनामा राखेर अभद्र व्यवहार सम्बन्धी कसुरमा अनुसन्धान भइरहेको जिल्ला प्रहरी परिसर काठमाडौँका एक जना अधिकृतले रातोपाटीलाई बताए ।
ती अधिकृत भन्छन्, ‘साउन २१ मा दिएको जाहेरीको आधारमा आरोपीलाई पक्राउ गरिएको हो ।’
