भोपाल । भारतको भोपालमा एक नवविवाहित जोडीले आफ्ना घरपालुवा जनावरहरू, एउटा कुकुर र एउटा बिरालोबिच मेलमिलाप गराउने बारम्बारको प्रयास असफल भएपछि सम्बन्धविच्छेद प्रक्रिया सुरु गरेका छन्।
भोपालको पारिवारिक अदालत स्रोतका अनुसार, जनावर प्रेमका कारण साथी बनेर विवाह गरेको यो जोडीलाई तिनै पाल्तु जनावरहरूको प्रेमले छुट्ट्याउन लागेको हो। डिसेम्बर २०२४ मा विवाहपछि सँगै बस्न थालेपछि समस्या सुरु भयो।
श्रीमतीले श्रीमानको कुकुरले आफ्नो बिरालोलाई सताउने र आक्रमण गर्ने गरेको आरोप लगाएकी छन्। अर्कोतिर, श्रीमानले विवाहअघि नै श्रीमतीलाई पाल्तु जनावर नल्याउन स्पष्ट पारेको दाबी गरे। उनले श्रीमतीको बिरालोले माछा ट्याङ्की वरिपरि घुमेर घरमा तनाव सिर्जना गरेको आरोप लगाए।
यता, श्रीमतीले बिरालोलाई छोड्न मानिनन् र श्रीमानको कुकुरलाई आक्रामक भनिरहिन्। श्रीमानले पनि आफ्नै कुकुरको पक्ष लिँदै बिरालोले समस्या ल्याएको बताए।
परामर्श र आफन्तको मेलमिलाप प्रयासका बाबजुद दुवै जना आ-आफ्नो जनावरको पक्षमा रहे। अन्त्यमा, उनीहरूले ‘मेलमिलाप असम्भव’ भएको कारण देखाउँदै सम्बन्धविच्छेदका लागि निवेदन दिए।
परामर्शदाता शैल अवस्थीले भने, ‘मानिसहरू पाल्तु जनावरहरूमा सामीप्य खोज्छन् र कहिलेकाहीँ तिनलाई मानवीय सम्बन्धभन्दा माथि राख्छन्। दुवै साझेदारले सम्झौता गर्न नमान्दा यस्ता विवाहहरू टुट्छन्।’
अदालतका अधिकारीहरूले यो असामान्य घटनाले ‘बढ्दो सामाजिक अलगावको बिचमा जनावरहरूमा भावनात्मक निर्भरता’ को गम्भीर समस्या देखाएको बताएका छन्।
