काठमाडौँ । सामाजिक सञ्जाल प्रयोग गर्दै ठगी गर्ने गिरोहले विभिन्न उपाय अपनाउन थालेका छन् । पछिल्लो समय ह्वाट्सएप प्रयोग गरी यस्ता गिरोहले बैंक खाताबाट रकम लगेको घटनाले धेरैको ध्यान आकृष्ट गरेको छ ।
भारतको उत्तर प्रदेश राज्यको बिजनौर र अमरोहा क्षेत्रमा यस प्रकारको ठगी निकै बढेको बताइएको छ । ठगी गर्ने गिरोहले मोबाइल प्रयोगकर्ताको ह्वाट्सएपमा विवाहको निमन्त्रणा कार्ड पठाएर मानिसलाई आफ्नो जालमा पार्ने गरेका हुन् । दुई महिना यता बिजनौरमा मात्र यस्ता १५ वटा घटना प्रकाशमा आएको भारतीय सञ्चारमाध्यमले जनाएका छन् ।
धामपुर निवासी डा. ओमप्रकाश चौहानका अनुसार उनलाई ह्वाट्सएपमा बिहेको एउटा निमन्त्रणा आएको थियो । निमन्त्रणा भनेर पठाइएको सो लिंकमा क्लिक गरेको केही मिनेटमै आफ्नो बैंक खाताबाट ३१ हजार रुपैयाँ गायब भएको उनले बताए ।
बिजनौर क्षेत्रका अतिरिक्त प्रहरी अधीक्षक डा. कृष्ण गोपालका अनुसार यस्ता फाइल ‘एपीके’ का रूपमा आउने गर्दछ । मानिसले आफूलाई बिहेको निमन्त्रणमा पठाएको त हो नि भनेर उक्त लिंकमा क्लिक गर्दासाथ उसको डिभाइसमा एउटा भाइरस सक्रिय हुने र फोन नै अर्काको नियन्त्रणमा पुग्ने बताइएको छ ।
बिजनौरमा मात्र यो वर्ष साइबर ठगीका तीन हजार ५०० भन्दा बढी केस देखिएको स्थानीय प्रहरीले जनाएको छ ।
अमरोहा जिल्लाको हसनपुरमा पनि एक महिलाको बैंक खाताबाट साइबर ठग गिरोहले साढे तीन लाख रुपैयाँ निकाल्न सफल भएको बताइएको छ ।
