राजधानी काठमाडौंमा एक इस्रायली नागरिकमाथि सोमबार राति स्थानीय व्यक्तिहरूले धातुको डण्डा (आइरन क्लब) प्रयोग गरी आक्रमण गरेका छन्। पीडित अल्मोग आर्मोजाका अनुसार, उनी बसिरहेको होस्टेलतर्फ फर्किँदै गर्दा उनको टाउकोमा कडा प्रहार गरिएको थियो।
जेरुसलाम पोस्टका अनुसार, पिडित आर्मोजाले भने — “यदि म तुरुन्तै भागेको नभए, म आज बाँच्ने सम्भावना निकै कम थियो।”
आर्मोजाको दाबीअनुसार, आक्रमणकारीहरूले उनलाई हिब्रु भाषामा कुरा गरिरहेको सुनेपछि लक्षित गरेका हुन्। उनले मित्रलाई पठाउन हिब्रुमा आवाज–सन्देश रेकर्ड गरिरहेको समयमा केही व्यक्तिले नजिकैबाट त्यो सुने र एक्कासि उनको टाउकोमा धातुको डण्डाले हाने। आर्मोजाले यो घटना आफ्नो इस्रायली परिचयका कारण प्रेरित ‘राष्ट्रवादी आक्रमण’ भएको दाबी गरेका छन्।
उनका अनुसार, घटनास्थल होस्टेलदेखि करिब १५० मिटरको दूरीमा थियो, जुन मार्ग सामान्यतया इस्रायली र अन्य विदेशी पर्यटकहरू प्रयोग गर्ने बाटो हो। उनले भने— “यो कुनै शंकास्पद गल्ली होइन। सामान्य पर्यटकले दैनिक प्रयोग गर्ने बाटोमै आक्रमण भयो।”
आर्मोजाले थप बताएका छन् कि आक्रमणकारीहरूले कुनै सामान चोरी गरेनन्, जसले उनीहरूको उद्देश्य लुटपाट नभई लक्षित हमला भएको संकेत गर्छ। पहिलो चोटमै बेहोस भएको भए घटना फरक रूप लिन सक्ने उनले बताएका छन्।
