बैंकक । गएको हप्ता सियम रायोङ्ग फाउन्डेसनका कामदारहरूलाई बाङ चाङ जिल्लामा रहेको एक घरमा आउनका लागि फोन आयो । ती घरमा बस्ने एक पुरुष सिजर भएर बेहोस भएका थिए ।
दुःखको कुरा उद्धारकर्मीहरू भनिएको घरमा आइपुग्दा ती पुरुषको मृत्यु भइसकेको थियो । पुरुष ४४ वर्षको थाविसाक नामवोङ्सा भएको बताइएको छ । श्रीमतीसँग सम्बन्ध विच्छेद गरेर बसेका पुरुषको १६ वर्षको छोरा थिए ।
मृतकको छोराका अनुसार उनको पिता एक महिनाभन्दा बढी समयदेखि बियर मात्रै खाएर बसिरहेका थिए । आफू एक दिन विद्यालयबाट फर्किँदा पितालाई सिजर भएर ओछ्यानमा ढलिरहेको अवस्थामा पाए । खाटको आसपास रित्ता बियरका बोतलहरू मात्रै थिए ।
उद्धारकर्मीहरूले शयन कक्षको भुँइमा बियरका सयौँ खाली बोतल देखे । यी बोतलको बिचमा ओछ्यानबाट उठेर हिँड्नका लागि निकै थोरै मात्रै ठाउँ थियो । आफू विद्यालयबाट आएपछि हरेक दिन पिताका लागि खाना पकाउने गरेको तर उनले केही पनि खान नमानेको छोराको भनाइ थियो ।
एक महिनाभन्दा धेरै समयदेखि पिता बियरकै भरमा बाँचिरहेको पनि उनले बताए । पितालाई भएका स्वास्थ्य समस्याबारे उनले केही पनि बताउन सकेनन् । तर सम्बन्ध विच्छेदको पीडा भुलाउन पिताले पिइरहेको चाहिँ उनले बताए । बियरमा क्यालोरी धेरै भए पनि यसमा शरीरका लागि अत्यावश्यक पोषक तत्त्व हुन्न ।
खानाको सट्टामा बियर मात्रै पिउँदा पोषक तत्त्वको अभाव र कलेजो खराब हुने जस्ता गम्भीर जोखिम निम्तन सक्छन् । बियर ठिक्क मात्रामा खानुपर्छ भनेर स्वास्थ्य विज्ञहरूले बताउँदै आएका छन् ।
