काठमाडौं । पूर्वनवयुवराज हृदयन्द्र शाहको एउटा भ्लगले अहिले चर्चा कमाइरहेको छ, जुन उनले जुम्लाको भ्रमण गर्दा बनाएका थिए । सबैले यो भ्लगको प्रशंसा गरिरहँदा जुम्लाकी माओवादी सांसद भने रिसले आगो भएकी छन् ।
फेसबुकमा लामो स्टाटस लेख्दै उनले आफ्नो भँडास पोखेकी हुन् । इतिहासका प्रसंगसमेत तोडमोड गर्दै उनले जुम्लाको भूमिमा फेरि अपवित्र षड्यन्त्रको रचना भइरहेको दाबी गरेकी छन् ।
माओवादीकी समानुपातिक सांसद छिरिङ ल्हामु लामा लेख्छिन्- राजतन्त्रमा सामन्ती राजाका धेरै पुस्ताले नेपाली जनतामाथि दोहान गरेको छ । अहिले उनका नातिले एउटा स्टन्टका लागि बनाएको एउटा भिडियोले मात्रै त्यो दोहन गरेको रिन चुक्ता हुन सक्दैन । उनी जस्तो सयौं पुस्ताले देश र जनताको सेवा गरिहाले पनि राज्य र जनता माथि गरेको शोषण, दमन र अत्याचारको भार चुक्ता गर्न सक्दैन ।’
अशिष्ट शब्दहरू प्रयोग गर्दै उनले हृदयन्द्रमाथि गालीगलौजगौज गरेकी छन् ।
लामा लेख्छिन्, ‘उसको पूरै वंश जिजुबाजेहरूले देशलाई कंगाल हुने गरी लुटेर दरबारमा थुपारेको धनले विदेशमा ऐसआरामले बिलासी जीवन बिताइरहेको भोटे कुकुरको छाउरा हुर्केझै गरेर हुर्काएको साँढे प्रवृत्ति जस्तैले जुम्ला चिनाउन पर्छ र ?’
हृदयन्द्रको भिडिओलाई मिडियाले समाचार बनाएकोप्रति पनि लामाको आपत्ति छ ।
‘यति धेरै मिडियाको हेडलाइन बन्नलाई पनि सामन्ती राजपरिवारकै हुनुपर्ने होइन त ? सामन्ती राजाले हिजो जनतालाई दास बनाई कुम्लाएका अथाह सम्पत्ति अहिले केही सामाजिक अभियन्ता र केही युट्युबेमा लगानी गरिरहेको पनि सुनिन्छ । हुँदाहुँदै एउटालाई त करोडौं लगानी गरेर संसदभित्र नै भित्र्याइसके, जो आज अराजकता मच्चाउनमा रेकर्ड कायम गर्न राजा र गणतन्त्र दुवैको दानापानीमा उफ्रिरहेको छ ।’
उनको यो अभिव्यक्ति भने राप्रपा सांसद ज्ञानेन्द्र शाही लक्ष्यित हो । शाही जुम्लाका जननिर्वाचित सांसद हुन् ।
