नयाँ दिल्ली । चक्रवात अर्नब बङ्गालको खाडीबाट भारतको आन्ध्र प्रदेशको तटतर्फ बढिरहेको छ। मौसम विभागका अनुसार यो अक्टोबर २७ सम्ममा भीषण आँधीको रूपमा परिणत हुन सक्छ।
यो अक्टोबर २८ को बिहान आन्ध्र प्रदेशको तटमा ठोक्किने आशङ्का गरिएको छ। यस अवधिमा प्रतिघण्टा १४० किलोमिटरसम्मको गतिमा तीव्र हवाहुरी चल्न सक्ने अनुमान छ।
आँधीको जोखिमलाई ध्यानमा राख्दै आन्ध्र प्रदेशमा करिब ६ लाख मानिसलाई सुरक्षित स्थानमा पुर्याउने तयारी गरिएको छ। तटीय जिल्लाहरूमा भारी वर्षाको अलर्ट जारी गरिएको छ भने माछा मार्नेहरूलाई अक्टोबर २९ सम्म समुद्रमा नजान सल्लाह दिइएको छ।
ओडिशामा पनि यस चक्रवातको ठुलो असर पर्ने आशङ्का गरिएको छ। उद्धार तथा राहत कार्यका लागि ६० वटा रेस्क्यु टोली तैनाथ गरिनेछ भने त्यहाँका छ वटा जिल्लामा अक्टोबर २८ र २९ गते स्कुल-कलेज बन्द रहनेछन्। यो चक्रवातको प्रभावका कारण मध्य प्रदेश र उत्तर प्रदेशसहित १० राज्यहरूमा वर्षाको सम्भावना रहेको छ।
अर्कोतर्फ तमिलनाडुमा विगत ३ दिनदेखि लगातार वर्षा भइरहेको छ। अरनिको भास्कर नगर जलमग्न भएको छ भने मानिसहरू आफ्नै घरभित्र थुनिएका छन्।
कोडाइकनालमा पर्यटकहरूको प्रवेशमा रोक लगाइएको छ। तिरुवारुर जिल्लामा पनि तीव्र वर्षा भएको छ, यद्यपि त्यहाँ स्कुल र कलेजहरू भने खुला नै रहेका छन्।
मौसम पूर्वानुमान अनुसार मंगलबार आन्ध्र प्रदेशमा भारी वर्षाको रेड अलर्ट र ओडिशामा ओरेन्ज अलर्ट जारी गरिएको छ। साथै छत्तीसगढ, तेलङ्गाना, तमिलनाडु, पुडुचेरी, केरला, कर्नाटक र रायलसीमामा वर्षाको यलो अलर्ट रहेको छ।
त्यस्तै बुधबार आन्ध्र प्रदेश, छत्तीसगढ, तेलङ्गाना र ओडिशामा अति भारी वर्षाको रेड अलर्ट जारी गरिएको छ भने झारखण्डमा ओरेन्ज अलर्ट छ। यसका साथै पश्चिम बङ्गाल, नागाल्यान्ड, मणिपुर, मिजोरम, त्रिपुरा, पूर्वी मध्य प्रदेश, विदर्भ र कर्नाटकमा वर्षाको यलो अलर्ट जारी गरिएको छ।
