चेङदु । चीनको सिचुवान प्रान्तको चेङदु सहरमा एउटा अनौठो घटना सार्वजनिक भएको छ। उच्चस्तरीय अपार्टमेन्टमा बस्दै आएकी एक महिला झ्याल सफा गर्ने कामदारले नाङ्गै सुतिरहेको देखेपछि डिप्रेसन र मानसिक आघातको शिकार भएकी छिन्।
स्थानीय मिडियाका अनुसार श्रीमान् चेंगले गत अप्रिलमा यो घटना भएको र त्यसयता उनकी पत्नी डिप्रेसन र चिन्ताग्रस्त अवस्थाबाट पीडित भएको बताएका छन्। दम्पतीले महिनामा करिब १० हजार युआन (१,३९० डलर) तिरेर लक्जरी अपार्टमेन्ट भाडामा लिएका थिए। उनीहरूले व्यवस्थापनलाई झ्याल सफा गर्ने बेलामा पहिले नै खबर दिन आग्रह गरेका थिए।
तर एक बिहान दुई कामदार अचानक बेडरुमको झ्याल बाहिर देखिएपछि नग्नावस्थामा सुतिरहेकी श्रीमती चेंग अत्तालिएकी थिइन्। यो घटनाले उनलाई गहिरो मानसिक आघात पुर्याएको श्रीमान् चेंगले सामाजिक सञ्जालमा लेखेका छन्।
‘चार महिना भइसकेको छ। चिकित्सकले मेरी श्रीमतीलाई डिप्रेसन र एन्जाइटी (चिन्ता) भएको बताए,’ उनले भने, ‘मैले व्यवस्थापनसँग सार्वजनिक माफी र उचित क्षतिपूर्ति मागेँ तर उनीहरूले अस्वीकार गरे। सुरुमा फलफूल लिएर आएर माफी मागेपछि तीन महिनादेखि उनीहरूले कुनै चासो देखाएका छैनन्।’
हालसम्म अपार्टमेन्ट व्यवस्थापनले आगामी भाडामा ६०० युआन छुट दिने प्रस्ताव मात्र गरेका छन्, जुन मासिक १० हजार युआन तिर्ने दम्पतीका लागि अस्वीकार्य भएको छ।
यो प्रकरण चीनको सामाजिक सञ्जालमा व्यापक बहसको विषय बनेको छ। कतिपयले व्यवस्थापनलाई दोषी ठहराएका छन् भने अरूले महिलाले पर्दा नलगाएर सुत्नु पनि गल्ती भएको बताएका छन्।
कतिपयले त व्यङ्ग्य गर्दै ‘उनले कामदारको ज्यान नै जोखिममा पारिन्, कसो आत्तिएर झ्यालबाट खसेनन्’ भनेका छन्।
