ग्वाङ्डोङ । चीनको ग्वाङ्डोङ प्रान्तमा एक विवाहित पुरुषले आफ्नो विवाहेत्तर सम्बन्धको खुलासा गरेको आरोप लगाउँदै फार्मेसीविरुद्ध कानुनी कदम चाल्ने तयारी गरेका छन्।
पिङ्गाङस्थित डासनलिन फार्मेसीमा उनले मोबाइल एपमार्फत १५.८ युआन (करिब २.२ अमेरिकी डलर) मूल्यका गर्भनिरोधक औषधि खरिद गर्दा भुक्तानी असफल भएपछि फार्मेसीले सदस्यता कार्डमा उल्लेखित नम्बरमा सम्पर्क गरेको थियो। सो नम्बर पत्नीको रहेकोले जब उनले औषधिबारे सोधपुछ गरिन्, कर्मचारीले सीधा गर्भनिरोधक औषधि भएको खुलासा गरिदिए।
पतिले सामाजिक सञ्जाल वेइबोमा लेख्दै फार्मेसीकै कारण दुई परिवार विघटनको अवस्थामा पुगेको दाबी गरेका छन्। उनले खरिद रसिद, पत्नी र कर्मचारीबिचको च्याट हिस्ट्री तथा प्रहरीमा दर्ता भएको उजुरीसमेत सार्वजनिक गरेका छन्।
तर कानुनी विज्ञहरूले उक्त उजुरी सफल हुने सम्भावना न्यून रहेको बताएका छन्। हेनान जेजिन ल फर्मका निर्देशक फु जियानका अनुसार, ‘वैवाहिक विघटनको मुख्य कारण पुरुषकै बेबफाइ हो । फार्मेसी कर्मचारीको फोन गर्ने उद्देश्य सूचनाको चुहावट होइन।’
सन् २०१८ मा अमेरिकाको लङ्ग आइल्याण्डमा पनि यस्तै घटना भएको थियो, जहाँ एक पुरुषले आफ्ना इरेक्टाइल डिसफङ्सन (यौन दुर्बलता) को औषधिबारे पत्नीलाई जानकारी दिएको आरोपमा सीभीएस फार्मेसीलाई मुद्दा हालेका थिए।
