दाङको तुलसीपुरमा रहेको बेचनी खोलाले गाडी बगाएको छ ।
खाद्रेबाट पर्सेनीका लागि छुटेको किराना सामान बोकेको ग १ ज १७१४ नम्बरको मारुती भ्यान आइतबार तुलसीपुर–७ स्थित बेचनी खोलाले बगाएको इलाका प्रहरी कार्यालय तुलसीपुरका निमित्त सूचना अधिकारी तथा प्रहरी निरीक्षक विनोदराज खत्रीले जानकारी दिए ।
उनका अनुसार, तुलसीपुर–६ का ४६ वर्षीय रामकुमार रेग्मीले चलाएको उक्त गाडी बेचनी खोला तर्ने क्रममा बीचमै स्टार्ट बन्द भएको थियो ।
त्यसपछि खोलामा पानीको बहाव बढ्दै जाँदा उक्त गाडी बगाएर १० मिटर तल लगेको थियो । घटनामा कुनै मानवीय क्षति नभएको प्रहरीले जनाएको छ ।
उक्त गाडी करिब १ घण्टापछि इलाका प्रहरी कार्यालय तुलसीपुरका प्रमुख डीएसपी अनिल ठकुरीसहित प्रहरी चौकी पर्सेनी, प्रहरी चौकी खाद्रेलगायतको प्रहरी टोलीले जेसीभीको सहायताले निकालिएको प्रहरीले जनाएको छ ।
