कैलाली । कैलालीको गोदावरी नगरपालिकास्थित अत्तरियामा चक्कु प्रहारबाट एक युवक घाइते भएका छन्।
आइतबार राति गोदावरी नगरपालिका–४ मा रहेको शुभम् होटलमा खाना खाइरहेका बेला डडेल्धुराको नवदुर्गा गाउँपालिका–२ का ३२ वर्षीय गौरव ऐरमाथि चक्कु प्रहार भएको प्रहरीले जनाएको छ।
जिल्ला प्रहरी कार्यालयका प्रवक्ता प्रहरी नायब उपरीक्षक राजकुमार सिंहका अनुसार ऐर होटलमा खाना खाइरहेका बेला ४/५ जनाको समूहमा आएका व्यक्तिहरूले उनीमाथि चक्कु प्रहार गरेका थिए।
घाइते ऐरलाई थप उपचारका लागि भारत पठाइएको प्रहरी प्रवक्ता सिंहले जानकारी दिएका छन्। चक्कु प्रहार गर्नेहरूको पहिचान खुलिसकेकाले उनीहरूको खोजी भइरहेको प्रहरीले जनाएको छ।
