काठमाडौं । जेनजी आन्दोलनका बेला काठमाडौँको बौद्धस्थित हायात होटलभित्र रहेको क्यासिनोमा भएको चोरी, आगजनी र तोडफोड प्रकरणमा संलग्न दुईजना पक्राउ परेका छन् ।
पक्राउ पर्नेमा सेठी भन्ने दावा शेर्पा र रने भन्ने रञ्जित खड्गी रहेका छन् । क्यासिनोभित्र रहेका संरचना तोडफोड, आगजनी तथा चोरीमा संलग्न व्यक्तिहरूको पहिचानका क्रममा प्रहरीले उनीहरुलाई पक्राउ गरेको हो ।
जिल्ला प्रहरी परिसर काठमाडौंले आइतबार सार्वजनिक गरेको विज्ञप्तिअनुसार क्यासिनोको काउन्टरमा राखिएको करोडौं रुपैयाँ अपरिचित व्यक्तिहरूले लुटेर लगेका थिए ।
दुवैलाई काठमाडौं जिल्ला अदालतबाट ७ दिनको म्याद थप अनुमति लिएर चोरी तथा डाँका सम्बन्धी कसूर, र आपराधिक उपद्रव मुद्दामा अनुसन्धान अघि बढाइएको छ ।
