काठमाडाैँ । भारतको मध्य प्रदेशस्थित पन्ना जिल्लामा दुई बाल्यकालका साथीहरूको भाग्य एकाएक चम्किएको छ।
केही हप्ताअघि मात्रै भाडामा लिएको एउटा सानो जमिनको टुक्रामा काम गर्ने क्रममा सतिश खटिक र साजिद मोहम्मदले एउटा चम्किलो ढुङ्गा फेला पारेका थिए।
उक्त ढुङ्गालाई आधिकारिक हिरा मूल्याङ्कनकर्ताकहाँ पुर्याउँदा त्यो १५.३४ क्यारेटको बहुमूल्य प्राकृतिक हिरा भएको पुष्टि भयो। यो हिरा अहिलेसम्म भेटिएका गुणस्तरीय हिराहरूमध्येको एक मानिएको छ।
हिरा मूल्याङ्कनकर्ता अनुपम सिंहका अनुसार यस हिराको बजार मूल्य करिब ५० लाख भारु (करिब ८० लाख नेपाली रुपैयाँ) पर्ने अनुमान गरिएको छ। यसलाई छिट्टै सरकारद्वारा आयोजना गरिने त्रैमासिक लिलामीमा राखिनेछ।
अन्तर्राष्ट्रिय बजारको डलर दर र ’रापापोर्ट रिपोर्ट’ को मापदण्डका आधारमा यसको अन्तिम मूल्य तय हुनेछ। पन्ना क्षेत्रमा वर्षौँदेखि हिराको खोजी हुँदै आए पनि यति ठुलो र गुणस्तरीय हिरा फेला पर्नु दुर्लभ मानिन्छ।
यो सफलताले खटिक र मोहम्मदको परिवारमा खुसीको सीमा छैन। मासु पसल चलाउने २४ वर्षीय सतिश र फलफूल बेच्ने २३ वर्षीय साजिद दुवै अत्यन्तै विपन्न परिवारका हुन्।
आफ्ना दिदीबहिनीको विवाह खर्च जुटाउन समस्या भोगिरहेका उनीहरूले अब यो रकमबाट परिवारको जिम्मेवारी पुरा गर्ने बताएका छन्। उनीहरूका अनुसार यो खोजले उनीहरूको जीवन सधैँका लागि बदल्ने निश्चित छ।
पन्ना जिल्ला भारतको सबैभन्दा कम विकसित क्षेत्रमध्ये एक भए तापनि यो हिरा खानीका लागि प्रसिद्ध छ। यहाँका स्थानीयहरूले रोजगारीको अभावमा सरकारबाट सानो जमिन भाडामा लिएर वर्षौँदेखि हिरा खोज्ने काम गर्दै आएका छन्।
साजिदका बुबा र बाजेले पनि दशकौँसम्म हिराको खोजीमा पसिना बगाएका थिए, तर उनीहरूले सधैँ बालुवा र क्वार्जका टुक्राहरू मात्र फेला पार्थे। साजिदका बुबा नफिसले आफ्नो पुस्ताको कडा परिश्रम र धैर्यताको फल भगवान्ले अहिले आएर दिएको बताएका छन्।
