काठमाडौं, २८ असार । नेकपा (एमाले) का पोलिटब्यूरो सदस्य तथा पूर्वमन्त्री महेश बस्नेतले काठमाडौं महानगरका प्रमुख बालेन्द्र शाहलाई स्टन्टबाज मेयरको संज्ञा दिएका छन् । उनले बालेनले ‘डिक्टेटरशिप ट्रेलर’ देखाएको आरोप लगाएका छन् । हिजो (शुक्रबार) बसेको काठमाडौं महानगरपालिकाको कार्यपालिका बैठक सायद नेपालको इतिहासमै पहिलोपटक यति छोटो अवधिमा सकिएको बैठक हो कि स्टन्ट हो ? भनेर सोधेका छ्न ।
बस्नेतले फेशबुकमा लेखेका छन्–
शुक्रबार बसेको काठमाडौं महानगरपालिकाको कार्यपालिका बैठक सायद नेपालको इतिहासमै पहिलोपटक यति छोटो अवधिमा सकिएको बैठक हो कि स्टन्ट हो? जम्मा ४५ सेकेन्ड!
साढे ६ महिनापछि टुप्लुक्क बसेको बैठक आन्तरिक कलहकै कारण ‘फास्टफुड मिटिङ’ बनेर सकियो। अरू सदस्यलाई मुख खोल्न त परै जाओस्, सास फेर्न पनि फुर्सद दिइएन।
जनताले ‘युवा नेतृत्व’ भन्दै जुन छलफल, सहकार्य र समन्वयको सपना देखेका थिए, त्यो सपना पनि ४५ सेकेन्डमै सिध्याइयो।
बालेन शाहजस्ता स्टन्टबाज मेयर, जसलाई कतिले ‘फ्युचर पीएम’ भन्दै हौस्याएका थिए, उनीबाट यति छिटो ‘डिक्टेटरशिप ट्रेलर’ देख्न पाइएला भनेर धेरैले कल्पनासम्म गरेका थिएनन्।
अब प्रश्न एउटै छ? एक व्यक्ति केन्द्रित ‘फास्ट मिटिङ मोडेल’ लोकतन्त्रको अभ्यास हो कि सेलिब्रिटी प्रवृत्तिको घमण्ड? ४५ सेकेन्डमै बैठक सक्ने अभ्यासले अब काठमाडौं महानगर्लाई कता पुर्याउने हो, यो हेर्न बाँकी नै छ!
